【回帶】成龍風騷開記招:犯咗天下男人都會犯嘅錯

小編少不更事,淨係知成蟲,呀成龍大哥當年因為吳綺莉懷有「龍種」而召開記者會,講左句:「做錯全世界好多男人都會做錯咗嘅嘢」,而得罪埋全部男人⋯⋯今日又因為「安心偷食」當日既成龍記者會又再出現啦,可以見到,成龍到場時未入戲,仲好風騷笑晒口,V晒手任記者影相,而一上台就開始啦⋯⋯

小編覺得呢句都好精彩:「如果一個有預謀,你係避都避唔到家!」

男士們,唔好高估自己嘅定力呀,唔好比危機接近自己啦!問心果句,有樣有身材妙齡少女埋到身,你可以抵擋得到?根本同中學雞問男同學「你有無睇AV?」一樣,答無一定係呃人呃自己!

古語有云:君子不立危牆之下!唔置身於危機之中就係最安全啦!

重溫「壞咗嘅人」許志安琴晚記者會講咩:

附上成龍1999年記者會自白 :

「多謝各位!首先講句辛苦晒,點解我會開呢個記者會,我可以講係為咗你哋(記者)而開。因為有三位你哋嘅行家噚日喺台灣撞到我,佢哋由香港飛去台灣,再由台灣跟咗我去新加坡。佢哋冇任何行李,冇酒店住,喺飛機上我同佢哋傾咗好多嘢,我冇避過佢哋,我從來都冇避過你哋。我走又走得快過你哋,打又勁過你哋,我使乜驚你哋?我覺得,你哋好辛苦。有好多假嘅消息令到你哋疲於奔命,不如我自己出嚟開記者會。我冇乜嘢智囊團,我講嘅嘢係隨心所欲,想講乜嘢就講乜嘢。我先講一講自己嘅感受,我估唔到成龍嘅Private私生活可以令到你哋咁煩。

如果唔係我契爺何冠昌死咗,你哋都影唔到我一家三口,你哋唔好質我食死貓,以前係咁,依家係咁,以後都係咁。我有諗過即刻返嚟開記者會,但我真係有事走唔開。事情丟低之後我諗一諗,好在我諗一諗,我唔希望成日你講我、我講你,成日見報。呢啲新聞對社會冇益,點解要講畀你聽我幾時去廁所,所有嘢都要講畀你聽?除非想做頭條,如果唔係會好醜,非常之醜。我唔需要向你哋交代,唔需要向全世界交代,如果要交代……我只需要向一個人交代,就係我嘅屋企人。如果我要講,就只得三個字,就係「唔交代」,但我知咁樣你哋會好嬲,重會傷咗好多人嘅心。如果唔係三個記者講咗佢哋嘅故事畀我聽,我唔會返嚟開記者會,點解要關心我私人嘅嘢先?多啲關心我嘅事業、電影咪重好!

李嘉誠先生講過,依家香港嘅報章九成假一成真,我依家信到十足,我搵唔出邊張報紙係有公信力嘅。我個人唔喺香港,但啲報紙可以講咁多內情出嚟,又話我會去台灣開記者會,我冇講過任何嘢。今日我講嘅任何一句說話都係我嘅真心話,係我講過嘅,唔好聽講,我又做唔到任何嘢,又唔夠啲報紙、雜誌財雄勢大,你哋可以請律師坐喺度,打官司我又打唔過你哋,你哋又可以萬幾蚊請個狗仔隊日日跟住我。

我係一個冇讀過書嘅人,其實我好粗魯,識得我嘅人都知道,我脾氣好大,所以我設立呢個遊戲規則,係希望大家淨係聽我講,唔好問。你一問,你果種尖銳嘅問題,好容易令到我發嬲。我發嬲,我好容易講好多錯字,而你哋亦利用你哋嘅文字手法去歪曲事實,亦係一種慣性,去作大好多嘢,而你哋得益咗,但你哋知唔知你哋可以傷害到好多人……傷害咗一個十八年嚟喺我後面默默支持我嘅女人……亦都可能會傷害到一個將近成年嘅青少年。

由台灣去新加坡,我所做嘅都係正經嘢,係同星霖公司傾合作拍電影、電視,係人哋主動,我每一次都係以做嘢為先……我知你哋冇興趣聽呢啲,我只係想講我嘅感受…… 我做錯咗嘢,做錯咗……全世界好多男人都會做錯咗嘅嘢……亦可以講係一時貪玩…… 我對唔住我嘅家人……但我好好彩……咁多年嚟佢都支持我……依家佢都會支持我……我太太原諒我,我個仔都好明白我。「但我再一次高抬貴手,請你哋唔好騷擾佢哋。……拜託你哋,我請求你哋……佢哋係無辜。……唔好去騷擾我一個八十歲……將近九十嘅老爸爸,畀佢安享晚年,你哋唔好再騷擾佢哋,佢哋係冇錯嘅。有錯嘅你嚟搵我、跟我,二十四小時我畀你哋跟……我了解你哋係被迫,你哋返去會俾上司迫,上司又再俾上司迫,為咗競爭,搞到今日嘅報紙咁唔健康,我亦希望……大家體諒以上嘢番說話,我係出自真心…… 如果個細路仔係我嘅,我一定會負責…… ,如果個細路仔出世……我亦希望你哋唔好騷擾佢,畀佢有一個好好嘅童年,因為你哋可以沒完沒了咁報道落去,而你哋嘅得益,係可以傷害到人哋……如果你哋係有預謀咁做……如果一個人係有預謀……你避都避唔到。如果你哋繼續去跟蹤我嘅家人,繼續用你哋嘅手段嚟訪問,我亦都唔會怪你哋……

咁多年來我冇試過去傷害任何人,但我亦唔係聖人,請大家亦唔好傷害我。今日我喺呢度講完呢番說話,以後我都唔會再講,你哋問我,我亦唔會再答。……再一次多謝你哋關心,我要講嘅嘢好多好多,但我知滿足唔到你哋嘅要求,但無論係點,以上係我嘅真心說話,多謝各位,多謝!